Amaia Ramos, ATEGIko zuzendari nagusia, TU Lankideren podcastean izan da, ATEGIren 25 urteko ibilbideaz, erosketa kooperatiboaz eta interkooperazioak gaur egungo testuinguru ekonomikoan duen balio estrategikoaz hitz egiteko.

Elkarrizketan, Amaiak ATEGIren izaera esaldi batean laburbildu du: erosketak eta interkooperazioa kudeatzen dituen negozio eredua da. 2001ean 16 kooperatibaren behar partekatuetatik sortu zen proiektua, eta gaur egun 300 bezero baino gehiago ditu. Bilakaera horretan, ATEGIk hazkunde kuantitatiboa ez ezik, nortasuna, posizionamendua, aitortza eta konfiantza ere irabazi ditu.

Amaiaren hitzetan, ATEGIren bereizgarri nagusia bezeroengandik gertu egotea da. Ez da soilik erosketak baldintza hobeetan kudeatzeko tresna bat; bezeroen beharrei erantzuteko, haiekin batera bidea egiteko eta une zailetan erantzun azkarrak bilatzeko eredua da. Bolumenak batzeak prezio hobeak ekar ditzake, baina baita erosketa baldintza sendoagoak, zerbitzu hobea, espezializazio handiagoa eta hornitzaileekin solaskidetza maila altuagoa ere.

Podcastak erosketa kooperatiboaren funtsa ere azpimarratzen du: ongizate komuna ongizate indibidualaren gainetik jartzeko gaitasuna. Horrek ez du esan nahi erabaki guztiak errazak direnik, baina bai taldean jarduteak enpresa guztiei balio handiagoa ematen diela. Interkooperazioaren bidez, enpresek bakarka lortu ezin dituzten gaitasunak, bolumena eta eragin ahalmena lor ditzakete.

Amaiak, gainera, gaur egungo testuinguru globalaren konplexutasuna nabarmendu du. Geopolitikak, energiak, hornidura kateen tentsioek eta Txinaren rolak erosketa arloa sakon aldatzen ari dira. Azken hamarkadetan prezioa, efizientzia eta just in time logika izan dira nagusi; orain, ordea, segurtasuna, arriskuen neurketa, hornitzaileen dibertsifikazioa eta hornikuntza bermatzea gero eta garrantzitsuagoak dira.

Testuinguru horretan, interkooperazioaren papera are garrantzitsuagoa dela defendatzen du ATEGIko zuzendari nagusiak. Mundu gero eta nahasiago batean, bakarka joatea zailagoa da; taldean aritzeak, informazioa partekatzeak eta bezeroei gertutik laguntzeak lehiakortasuna indartzeko aukera ematen du.

ATEGIren 25 urteko ibilbidea, beraz, ideia argi baten inguruan laburbil daiteke: elkarlana ez da balio kooperatibo bat bakarrik; lehiakortasuna eraikitzeko modu eraginkorra ere bada.